Numbers 3

Levi-te

1Hih in, Sinai Vum tungah TOPA in Moses a hopih lai-a Moses le Aaron-te innkuan simna ahi hi. ^a

2 Aaron tapate minte: a tacil Nadab tuateh Abihu, Eleazar le Ithamar ahi hi. 3Tuate pen sathau kinilhsa siampite, siampi sem dinga a kikipsaksa Aaron tapate ahi hi. 4Nadab le Abihu ahileh Sinai Sehnel gamah mei siangtho lo zangin TOPA maiah biakna a piak uh ciangin ama mai-ah pukin a si uh hi. Amaute in tapa a nei kei uh hi; tua ahi ciangin a pa uh Aaron a nuntak hun sungin Eleazar le Ithamar bekin siampi a sem uh hi. ^b

5 TOPA in Moses tungah, 6“Levi behte paipih inla, amah huh dingin amaute siampi Aaron tungah pia in. 7Amaute in Kikhopna Puanbuk-a biakbuk na a sepna uah ama ading le mipi bup adingin na a sem ding uh hi. 8Amaute in Kikhopna Puanbuk sunga nazat khempeuh kem ding uh a, biakbuk nasepna ah Israel dangte hih ding ngeina teng a tangtungsak ding uh hi. 9Aaron le a tapate tungah Levi-te pia in; ama a tungah a kibup piak Israel-te amaute ahi hi. 10Aaron le a tapate siampi sem dingin seh in; munsiangtho ah a pai midang khatpeuh kithat ding hi,” a ci hi. ^c

11 TOPA in zong Moses tungah, 12“Israel-te lak panin Israel numeite’ tapa upa pen mun-a dingin Levi-te ka la khin zo hi. Levi mite kei aa ahi hi; 13ahang in, ta cilte kei aa ahi hi. Egypt ah tacil khempeuh ka sattuk lai-in mihing ahi a, ganhing ahi zongin Israel-te pana suak tacil peuhmah kei adingin ka tuam koih hi. Amaute kei aa ahi ding uh hi. Keimah TOPA ka hi hi,” zong a ci hi. ^d

14 Sinai Sehnel gama Moses tungah TOPA in, 15“Levi-te amau bawng’te le a innkuante zui-in sim in. Pasal kha khat pan a tungsiah peuhmah sim in,” a ci hi. 16Tua ciangin TOPA kammal in amah a thupiak bangin Moses in amaute a sim hi. ^e

17 Hihte Levi tapate minte ahi hi: ^f
Gershon, Kohath le Merari. ^g
18 Hihte, Gershon bawng’te minte ahi hi:
Libni le Shimei. ^h
19 Kohath bawng’te:
Amram, Izhar, Hebron le Uzziel. ⁱ
20 Merari bawng’te: ^j
Mahli le Mushi. ^k

Hihte in amau innkuan zui-in Levi behte ahi hi.

21 Libni mite le Shimei mite pen Gershon bawng’te ahi uh hi; hihte pen Gershon mite bawng’te ahi hi. 22Kha khat pan a tungsiah a pha pasal a kisim khempeuh 7,500 a pha hi. 23Gershon mite bawng’te in biakbuk nung nitumna lamah giahphual a sat uh hi. 24Gershon mite innkuan makaipa, Lael tapa Eliasaph ahi hi. 25Kikhopna Puanbuk ah Gershon mite tavuan in: biakbuk le puanbuk a khuhnate tawh, Kikhopna Puanbuk lutna a puankhai, 26buktual a puankhaite, biakbuk le biakna-tau kimkot-a, a huang umna puante le a khaute - le tuate tawh a kizom na khempeuh ahi hi.

27 Amram mite, Izhar mite, Hebron mite le Uzziel mite pen Kohath bawng’te ahi uh hi; hihte in Kohath mite bawng’te ahi uh hi. 28Kha khat pan a tungsiah pasal peuhmah 8,600 b a pha uh hi. Munsiangtho cin ding Kohath-te tavuan ahi hi. 29Kohath-te bawng’te in biakbuk leitaw-lam pangah giahphual a sat uh hi. 30Kohath innkuante bawng’te makaipa, Uzziel tapa Elizaphan ahi hi. 31Amaute tavuan in singkuangpi, sabuai, meivak tunna, biakna-tau, biakna nasepna-a kizang mun siangtho sunga nate, puanzak, le tuate tawh kizom na khempeuh cin ding ahi hi. 32Levi-te makai lian pen siampi Aaron tapa Eleazar ahi hi. Amah munsiangtho cing dinga tavuan neite khempeuh tunga a uk dinga kikoih ahi hi.

33 Mahli mite le Mushi mite pen Merari bawng’te ahi uh hi; hihte, Marari bawng’te ahi uh hi. 34Kha khat pan a tungsiah pasal a kisim peuhmah 6,200 a pha hi. 35Merari innkuan bawng’te makaipa Abihail tapa Zuriel ahi hi; amaute in biakbuk leilu-lam pangah giahphual a sat uh hi. 36Merari mite pen biakbuk singpekte, a zawnna zawlte, a khuamte, a bullente, a kizang nengneng khempeuh, le tuate tawh a kizom a kizang na khempeuh, 37tuate banah a huang umna khuamte a bullente tawh, puanbuk khetphim le a khaute tawh a cing dinga kiseh ahi hi.

38 Moses le Aaron le a tapate in biakbuk nisuahna-lam pangah nisuahna-lam nga-in Kikhopna Puanbuk mai-ah giahphual a sat uh hi. Amaute in Israel-te tangin mun siangtho cin tavuan la ding uh hi. Midang khatpeuh mun siangtho nai-in a pai leh kithat ding hi. ^l

39 TOPA thupiakna tawh Moses le Aaron in amau bawng’te zui-a a sim uh kha khat pan a tungsiah pasal peuhmah 22,000 a pha hi.

40 TOPA in Moses tungah, “Israel-te tacil pasal kha khat pan a tungsiah peuhmah sim inla amaute min ciamteh in. 41Israel-te tacilte tangin kei adingin Levi-te nong laksak dinga, Israel-te ganhing tacilte khempeuh tangin Levi-te ganhingte nong laksak ding hi. Keimah TOPA ka hi hi,” a ci hi. ^m

42 Tua ciangin TOPA in amah a thupiaksa bangin Moses in Israel-te tacil khempeuh a sim hi. 43A min a ciamteh kha khat pan a tungsiah tacil pasal khempeuh 22,273 a pha hi.

44 TOPA in Moses tungah, 45“Israel tacil khempeuh tangin Levi-te la inla, amaute ganhing tacil tang dingin Levi-te ganhingte la in. Levi-te kei aa hi ding hi. Keimah TOPA ka hi hi. 46Levi-te sangin tatkhiat ding Israel-te tacilte 273 in tamzaw hi; 47tuate tat nadingin mun siangtho shekel gerah sawmnih a gik tawh kizui-in mi khat ciangin shekel a nga ta khawm in. 48Tua sum pen Israel-te a tamzawknate tatna-in Aaron le a tapate tungah pia in,” zong a ci hi.

49 Tua ciangin Moses in Levi-te banah a val lai mite tung panin kitatna sum a kaikhawm hi. 50Amah in Israel tacilte panin munsiangtho shekel b tawh kizui-in sumngo shekel 1,365 a kaikhawm hi. 51Moses in TOPA thupiakna kammal bangin tua tatna sumte Aaron le a tapate a pia hi. ⁿ